A Homenaxe O Escritor na súa Terra, impulsada pola Asociación de Escritoras e Escritores en Lingua Galega (AELG), chega este ano á súa XVII Edición recaendo, por decisión unánime da súa Asemblea de Socios e Socias, na figura de Paco Martín, que será homenaxeado na súa terra natal, a cidade de Lugo, o vindeiro 25 de xuño.
Esta iniciativa anual conforma xa unha tradición na traxectoria da AELG, e tense constituído ao longo de década e media como unha celebración na que a terra de orixe do homenaxeado/a cobra un protagonismo fundamental. É vontade da AELG honrar escritores/as procurando o contacto directo co autor/a e a súa implicación persoal na xornada de homenaxe. Hai que lembrar que en edicións anteriores foron homenaxeados Antón Avilés de Taramancos, Bernardino Graña, Manuel María, Agustín Fernández Paz ou Marilar Aleixandre, entre outros grandes das nosas letras.
O Escritor na súa Terra trátase dunha celebración múltiple e popular na que se vén recoñecendo a entidade literaria de insignes figuras das nosas letras, a través dunha serie de eventos como a entrega do galardón Letra E de escritor/a (unha peza escultórica asinada por un/ha recoñecido/a artista galego/a, neste caso Silverio Rivas), a plantación dunha árbore simbólica elixida polo propio autor, a colocación dun monólito conmemorativo e a atribución do nome do homenaxeado/a a un espazo público ou infraestrutura cultural, neste caso a Biblioteca Municipal do barrio da Piringalla.
Os actos principiarán ás 11.30 h. na Avenida Ramón Ferreiro (á altura do número 16) de Lugo coa plantación da árbore simbólica do escritor e descubrimento do monólito conmemorativo. De seguido terá lugar a entrega da “Letra E” e o anuncio da inauguración da Biblioteca do Barrio da Piringalla co nome de Paco Martín. Os actos rematarán cun xantar de confraternidade no Restaurante do Hotel Méndez Núñez aberto aos/ás socios/as da AELG, á vecindade de Lugo e demais persoas interesadas.