Ramón Trigo, Marc Taeger, David Pintor, Pablo Otero, Óscar Villán, Federico Fernández, Alicia Suárez, Juan Rivas, Francisco Pérez Porto e Kiko Da Silva son os dez ilustradores que participan na exposición Soños Ilustrados: Kalandraka, 12 anos de álbum galego, que se poderá visitar no Espazo EMAO da Escola Municipal de Artes e Oficios de Vigo a partir deste venres, 15 de abril, e ata o 10 de xuño. A mostra reúne -por primeira vez en Vigo- un grupo de ilustracións e traballos pertencentes a unha vintena de álbums editados por Kalandraka, algúns dos cales recibiron importantes distincións a nivel autonómico, estatal e internacional.
As obras abarcan unha ampla variedade de estilos e disciplinas artísticas: dende obra pictórica, ata cerámica, pasando por banda deseñada, collage, figuras tridimensionais ou técnica dixital. Os comisarios da exposición, Federico Fernández e Miguel Vázquez, destacaron que esta mostra pretende “elevar a Ilustración Infantil, que nos últimos anos acadou unha notable importancia, á categoría de ARTE con letras maiúsculas".
O Espazo EMAO abre as súas portas de martes a sábado entre as 19.00 h. e as 21.00 h. para compartir a laboriosa mestría estes traballos artísticos e o traballo dos seus autores. Dende o pasado mes de xaneiro, a sala de exposicións da Escola Municipal de Artes e Oficios é un lugar aberto a toda a cidadanía viguesa para a difusión da cultura e da creación, en forma de coidadas obras artesás e artísticas. A oferta expositiva do Espazo EMAO complementa a faceta académica e formativa desta Escola centenaria, na que se se imparten clases de artesanía do coiro, encaixe de palillos, moda e confección, ourivaría, pintura, debuxo, volume e modelado, escultura e talla en madeira, cerámica artística, encadernación, serigrafía, clases de construcción de zanfona, gaita e luthería antiga.