Dióxenes, de Pablo Albo e Pablo Auladell; e Miguel Hernández, 25 poemas ilustrados, ámbolos dous publicados pola editorial pontevedresa Kalandraka, veñen de ser distinguidos polo Ministerio de Cultura con cadanseu terceiro Premio Nacional de Edición nas categorías de Libro de Arte e de Libro Infantil, respectivamente. Os títulos galardoados foron escollidos entre 318 obras.

Estes premios non teñen dotación económica pero son moi valorados polos editores polo que supón de recoñecemento e prestixio ao seu labor editorial, así como pola difusión que conleva, ao ser incluídos nas accións de promoción do libro e expostos nas principais feiras nacionais e internacionais.

O xurado estivo presidido por Mónica Fernández, subdirectora xeral de Promoción do Libro, a Lectura e as Letras Españolas. Actuaron como voceiros Teresa Mezquita pola Biblioteca  Nacional de España, Andrés Fernández pola Federación de Gremios de Editores de España, Manuel Vacas pola Federación  Empresarial de Industrias Gráficas de España, Augusto Jurado polo Club de Gráficos  Eméritos, Natividad Correas e  Rocío San Claudio a proposta do director xeral do Libro, a Lectura e as Letras Españolas e Marta Sáenz Bascones, funcionaria experta do Ministerio de Cultura.