Ana Abad de Larriva é a gañadora do II Premio Roberto Vidal Bolaño pola súa obra A sombra das árbores, que se impuxo aos 14 orixinais presentados.

O xurado, formado polo dramaturgo Carlos Labraña, a actriz Mónica Camaño e o profesor Delio García Represas, e coa tamén dramaturga Raquel Castro como secretaria con voz, pero sen voto  destacou que A sombra das árbores é unha proposta teatral de corpo poético onde movemento e palabra cobran especial importancia. Preséntanse como unha peza teatral aberta onde a dirección, xunto co grupo de actrices e actores, construirá desde ese non lugar un escenario simbólico poboado por un bosque de sombras que é o espazo que habitamos.

O Premio Roberto Vidal Bolaño, nacido o pasado 2018, está convocado polo Concello do Porriño, a Editorial Galaxia e o Equipo de Dinamización Lingüística do IES Ribeira do Louro, e ten como finalidade animar á escrita de pezas teatrais dirixidas ao público mozo, é dicir, ao alumnado da ESO e Bacharelato. A súa primeira edición foi para Fernando Castro Paredes coa súa obra A derradeira bala.

O premio, ademais  da cantidade económica establecida nas bases do premio, conleva a publicación da obra por parte de Galaxia na súa colección Costa Oeste, nunha aposta decidida pola dramaturxia na nosa lingua. O acto de entrega do galardón terá lugar no IES Ribeira do Louro, no Porriño, o vindeiro sábado 29 de xuño ás 19.00 h.