O escritor Agustín Fernández Paz e o ilustrador Miguelanxo Prado optarán ao Premio Astrid Lindgren 2016, que outorga o goberno de Suecia para honrar a memoria de Astrid Lindgren, creadora de Pippi Långstrump ou o Os nenos de Bullerbyn. Este premio, de modo anual, recoñece a un autor de literatura infantil e xuvenil, a un ilustrador ou a un promotor da lectura de calquera país, ademais de estar considerado como un dos galardóns máis importantes do mundo relacionado coa literatura infantil e xuvenil.

Para o Premio Astrid Lindgren 2016 están nomeados 215 candidatos, que se deron a coñecer no transcurso da Feira do Libro de Frankfurt que se celebra esta fin de semana. Agustín Fernández Paz e Miguelanxo Prado foron propostos pola Organización Española para o Libro Infantil e Xuvenil.

O nome do gañador anunciarase en Estocolmo o 5 de abril de 2016.